AIV infekciya –bul sozılmalı infekcion, adam immun jetispewshilik virusı keltirip shıǵaratuǵın kesellik esaplanadı. AIV adamnıń immun sistemasın zıyanlap, onıń AIVǵaǵana emes, al ekilemshi keselliklerdin, mısalıǵa tuberkulyoz, zamarrıqlar, pnevmoniyalar, ORVI, viruslı gepatit h.t.b; rawajlanıwına qarsılıq kórsetiwine múmkinshilik qaldırmaydı. AIJS-arttırılǵan immunitet jetispewshiligi sindromı AIV infekciyası rawajlanıwınıń sońǵı basqıshı. AIV infekciyanıń terminal basqıshında immunitet dárejesiniń sonshelli túsip ketiwiniń nátiyjesinde AIV infekciyası fonında rawajlanǵan ekilemshi kesellikler qaytarıp bolmaytuǵın tús aladı hám aqıbetinde ólimge alıp keledi. AIV organizmniń suyıqlıqları arqalı tarqaladı: qan, jınısıy organ suyıqlıqları hám ana súti. AIV bir adamnan ekinshisine jınısıy qatnasta AIV menen zıyanlanǵan adamnan; AIV menen zıyanlanǵan narkotik qabıllawshılar menen bir iyneden paydalanılsa, jeterli dárejede sterilizaciya islenbegen teri pútinligin buzatuǵın medicinalıq hám medicinalıq emes manipulyaciyalar arqalı; eger ana AIV menen zıyanlanǵan bolsa hám iledarlıq waqıtında, balanı tábiyiy jol menen tuwǵanda hám ana súti menen azıqlandırǵanda balaǵa juǵadı; AIV menen kesellengen adam menen bir hájetxanadan paydalanılsa, qushaqlasqanda, qol berip kóriskende, infekciyalanǵan adam menen birge awqatlanǵanda,onıń qol telefonın paydalanǵanda juqpaydı.